قبل ما أي حد "يألش" نسمي القصيدة دي "هاتولي راجل"

الاسم الحقيقي "أنا راجل "

ما يكسفنيش أكون راجل

في عين راجل ماهوش راجل

ولو راجل ما كنتش أضايقه وأنا راجل

وفي راجل عشان راجل أشد ما يعجبه فيا إن أنا راجل

لأننا شعب فيه الراجل بيتباهى إنه متجوز صبية لكن بـ100 راجل

ويا راجل باسمك بس لأ بالفعل مش راجل

دا راجل كل من ميز قليل الأصل م الراجل

وراجل كل من صمم عشان الحق مات راجل

وراجل كل من قدّر وقوف الست مع راجل

وراجل كل من راعى اللي خالقه في حرمة الراجل

وطول عمر اللي بيصون الأمانة بنعرفه راجل

ومن يومنا اللي فعله شبه كلامه بنوصفه راجل

وحكم العدل ما بيطلعش عمره إلا من راجل

وعمر الندل مهما لعب حديد ما بيتقلب راجل

وأنا عارفة إني أنا راجل

فيكرهني اللي مدي شوية على راجل

ويعشقني اللي راجل خلفه راجل

دكر و نتاية ده التصنيف 

لكن الرك ع التوصيف

بيبقى دكر ومش راجل

وتبقى نتاية بس أرجل من الراجل