لسان عصفور بالخضروات

مرة كنت زهقانة من الرز والخضار السوتيه وكمان ماكنش عندى مكرونة… لقيت عندى لسان عصفور … رحت افتكست افتكاسة كدة بيه وطلعت تحفة. لسان عصفور بالخضروات زى فكرة طاجن لسان العصفور كدة بس على النار … المقادير: • لسان عصفور مسلوق عادى زى المكرونة • بصل متقطع صغير • نص كوباية شوربة منزوعة الدسم • ماء • خضروات متقطعة صغير أو مبشورة (أنا استخدمت طماطم وفلفل ألوان وكوسة وجزر مبشورين وفاصوليا متقطعة صغير أوى) إللى كان عندى يومها.. • ملح وفلفل وجوزة الطيب أو اى بهارات بتحبوها الطريقة: • نشوح البصل على النار فى معلقة شاى زيت لغاية مايبقى ذهبى وبعدين ننزل بالجزر الأول وبعدين الفلفل الألوان ونسيبه دقيقتين. • بعدها ننزل باالكوسة وآخر حاجة الطماطم عشان أنا عايزاها تستوى بس ماتعملش صلصة. • وبعدين نتبل بالملح والفلفل وجوزة الطيب وننزل بالماية والشوربة أو نص مكعب ماجى لو مافيش شوربة. • ونسيبهم شوية لغاية ما كل الخضار يستوى ويشرب ميته بس يبقى متبقى حبة مية صغيرين. • بعدها ناخد لسان العصفور (6 معالق أكل لكل شخص) ونقلبه مع الخضروات وخلاص كدة. لازم بعد مانقلب لسان العصفور مع الخضروات مايكونش ناشف وتكون المية إللى متبقية مع الخضار مخلياه سلس وطرى كدة.. حسيت انى استخدمت لسان العصفور بعد فترة طويييييلة ماكنتش بستخدمه عشان الدايت وبدل المكرونة وتجديد فى نفس الوقت . ممكن بقى تعيشوا حياتكوا ف الخضار زى ماتحبوا… بروكلى بقى.. بسلة.. فاصوليا متقطعة صغير.. أى حاجة بتحبوها..