أحمد زاهر يعلن عن أسباب عدم حضوره افتتاح القاهرة السينمائي

كشف الفنان أحمد زاهر، عن السبب الحقيقي وراء غيابه عن افتتاح مهرجان القاهرة السينمائي الدولي، وذلك عبر حسابه الرسمي على "فيسبوك".

وأوضح زاهر: "طيب بما إن المصدر بيسيح وبيفضح الفنانين اللي مراحوش فمن حقي أدافع عن نفسي، رغم استلامي الدعوة قبل المهرجان بـ 3 أيام، أنا كان عندي تصوير في نفس اليوم في ديكوري ومفيش مشهد من غيري في إستوديو المغربي، وبيتهيألي تقدروا تتأكدوا من ده وحاولت تأجيله معرفتش طب أعمل إيه".

وأضاف: "ثانيا بصراحة مش مقتنع أني أكون سعيد ومتشيك وبضحك قدام الكاميرات والناس عشان مهرجان بلدي، وأنا حزين ومتدمر عشان وفاة الفنان محمود عبدالعزيز، وتاني يوم أكون في العزاء حزين ومتاثر، إيه التناقض ده، أنا معرفش أكون متناقض يعني حتى لو مكانش عندي تصوير مكنتش هروح لأن مبعرفش أكون متناقض".

وتابع: "وأكيد زملائي كان عندهم ظروف برضه، لأن أكيد نتمني جميعا الحضور ودعم مهرجان بلدنا، وعلي فكره أنا مش بلوم أي حد من زمايلي اللي راحوا المهرجان مهو لازم ناس تروح و تدعم المهرجان، ويكون عندها القدرة على أنها تفصل ولكن أنا بتكلم عن نفسي، أنا اللي مقدرش هي قدرات وللأسف القدرة دي مش عندي، وعمومًا ألف مبروك لافتتاح مهرجان بلدي، وأتمنى له كل النجاح والتوفيق والإزدهار".